(( وَلَا تَحْسَبَنَّ الَّذِينَ قُتِلُوا فِي سَبِيلِ اللَّهِ أَمْوَاتًا ۚ بَلْ أَحْيَاءٌ عِندَ رَبِّهِمْ يُرْزَقُونَ (169)) .. الرحمة والمغفرة لكل شهداء هذا الوطن العظيم .. الرحمة والمغفرة لكل شهداء الثورة السودانية والرحمة والمغفرة لابطال وشهداء التاسع والعشرين من رمضان .
في الاول عاوز اطمن كل الناس السألت واللي اتصلت ورسلت انو انا بخير الحمدلله عانيت من اصابات ما كانت خطيرة واتجاوزتها الحمدلله .. وبعتزر كتير لكل الناس الما قدرت ارد عليها في الماسنجر بسبب كمية الرسايل وكمية جمال الشعب دا وانو كل الناس عاوزة تطمن .. بالجد شكراً ليكم ❤انا جاتني كمية رسايل حكون طول عمري مبسوط وفخور لابعد درجة من جمال الحاجات الفيها شكرا شديد مرة تانية ❤
شكراً كتير لي اهلنا الكانو معانا بي قلوبهم وشكرا شديد لابعد درجة للاصحاب والصحبات الكانو معانا لحظة بي لحظة واللي ما عارف من غيرهم كنت كيف اتجاوزت الفترة الفاتت دي ❤
الفترة الفاتت العدت علي دي بعتبرهاا واحدة من اصعب المراحل العدت علي في حياتي بصورة عامة .. من بعد مجزرة القيادة والروح الانهزامية الكانت في الزول وهو كان بيشوف اخوانو بيموتو قدامو وهو ما قادر يعمل حاجة وشاف كمية الذل الكانو بيستخدموها الجنجويد قدام الناس من اطفال لي شباب لي رجال كبار وامهات اتعرضو لي اكعب انواع الاهانة .. ياخي للاسف حتى ذوي الاحتياجات الخاصة الكانو موجودين اتضربو بأبشع الصور في لحظات عمرها ما حتروح من بالي .. في واحد من الفديوها وانا مصورها قدام البحرية ممكن تلاحظو كيف كان السقف بيتساقط فوق راسنا من ضرب الرصاص العشوائي الكان حاصل 💔 دا كلو كوم وخذلان الجيش للمواطنين كان كوم تاني .. احساس نكون محتمين بيهم في نصهم وفجأة يجو شايلين سيطان وحتى هم بدو يضربو فينا !! وكلام واحد من عساكر الجيش لم سمع واحد من الثوار بيقول ليهو نمرق نموت يعني !؟ فقام رد ليهو بكل برود ( ما تموتو يعني نحن نعمل ليكم شنو ! )في لحظتهاا كل الناس فقدت الامل لانو خلاص ماف حل غير انو الناس تمرق تقيف قدام الموت وتنتظر الحيحصل ليها .. فقدنا الامل وبقينا نتحرك من مكان للتاني ونحن منتظرين واحدة من الرصاص الحولينا يصيبناا في اي لحظة ..غير انو اللحظات الكنا بنحاول نمرق فيها نفسنا وكل شوية نسمع ضرب نار في اتجاهنا ونلقى واحد مننا وقع واتكررت العملية لمرات كتيرة وكمية الألم اللي في انو ما ما قادرين نقيف ونشوف الوقع دا الحصل عليهو شنو 💔💔 متخيلين انتو نفسنا كانت مكسورة لي ياتو درجة في اللحظات دي !! .. ما كنت قادر افكر في حاجة غير ناس البيت والاصحاب والناس البنحبهم في حياتنا وكنت بقول انو خلاص ما اظن تاني حاشوف الناس دي 💔 دا غير سرقة التلفونات الكانت حاصلة ونهب القروش والساعات والحاجات القيمة الكانت موجودة عند المواطنين .. وبموقف شخصي مر بي انو التلفونات بتاعتي اتشالت والكلاش فوق راسي مباشرة من اتنين من اطفال الدعم السريع اعمارهم لا تتجاوز ال18 عاماً !!
نحن في اليوم داك لقينا الضرب في اي مكان كانو منتشرين بي صورة كبيرة .. اول رصاصة سمعنا صوتها كانت في شارع النيل ومن لحظتهاا ولي اكتر من ساعتين ونحن داخل الاعتصام ضرب النار ما وقف على اتجاه شارع النيل .. والله ياخ كل الألم بيحصل لم الزول يتذكر الناس الكانت هناك والحصل ليها شنو 💔 ولا حانسى كمية الاهانات والكلمات السمعتها اثناء اعتقالنا تحت كبري كوبر ومنها كلمات كتيرة ما طلعت من راسي ولا لحظة ( يا كفار يا اعداء الله ) (عاملين فيها صايمين ! امشي جيبو موية شربوهم ) ( اقبض الفدادية دي ) الجملة دي اتقالت لي واحدة من الامهات عمرها يتجاوز ال40عاما في كامل حجابها .. ( عاملين فيها صابنها ؟! الليله صابنها نحن ديل ) ( نحن جاهزية سرعة حسم يعني ما بتاخدو في يدنا خمسة دقايق !!) ( نحن قاعدين في الخلا اليوم كلو وفي ضهر الحمير وانتو راقدين في المكيفات وجايين تقلو ادبكم ) (لبسونا الكاكي الاسود العفن دا كلو بسببكم) الجملة دي قالها واحد من العساكر الكانو لابسين لبس بوليس بكل زعل وهو بيشير للكاكي الجديد الكان لابسو .. ( والله ما حنخليكم دقوهم زيادة بسببكم ما ادونا اجازة عيد ) وكتير من النبذ والالفاظ الجات منهم .
انا صح مرقت من الموت الحصل هناك .. بس والله من يومها وزي نحن خليناا روحنا بي وراناا وما طلعنا بيهاا زي كأنو فقدنا حاجة جواناا ما اظن ترجع وبرغم اي حاجة لسه الزول حاسي نفسو مقصر .. بيحس نفسو مقصر وهو بيشوف الناس الكانت اخر لحظاتها قضتها قدام التروس .. الناس الكانت بتطمن في الناس اثناء ضرب الناس ويقولو ما تخافو ربنا اكبر منهم كلهم ولو نحن متنا اخوانا ما حيخلو حقنا .. مقصرين قدام نفسنا لم بنشوف في المستشفى زول مضروب نار في كتفو يقوم براهو ويكورك للمصاب الجايبينو جديد مضروب في صدرو ويقول ليهم جيبوهو هنا .. رقدوها هناا .. حنشوف نفسنا مقصرين لم عيني وقعت على واحد من الشباب وهو بيقول للعساكر دي بت خلوها اضربوني انا !!
متخيلين انتو !! متخيلين انو في نص المآساة الكانت حاصلة دي الشعب لسه كان بيثبت انو اجمل شعب في الدنيا .. ❤ انا فخور جدا اني سوداني وفخور اكتر بي كل الناس الحضرت اليوم دا .. وفي كل حياتي ما حيتنسي ولا حأنسى قدر شنو انا اتغيرت بسبب اليوم دا وبسبب العشناهو فيهو وقدر شنو اولويتنا اتغيرت في الدنيا دي واكتشفت انو كل الحنمر بيهو في الدنيا من تفاصيل زعل ولا فرح حتكون نقطة صغيرة من تفاصيل وكمية الاحساس الكانت يوم ٢٩ رمضان
ماف حاجة حتصلح الجوانا من فقد لي شهداء البلد دي غير انو حقهم يرجع .. وان شاء الله وبأذن الله كل الشعب ما حيتنازل ويفضل لينا دا مطلبنا الوحيد لو حتى مدنية .✌
الحمدلله على كل حال واكيد ربنا ما حيخذلنا ❤✌
هاشم جلاس
#توثيق_مجزرة_القيادة